【體路專欄】拜仁捕「蜂」 續領群雄



體路專欄,足球,football,梁冠聰

【體路專欄】德甲重開之後踢咗18場比賽,各隊合共炮製59個入球,球迷睇到咁多個入波當然開心啦。不過,睇還睇,都要小心身體,千祈唔好慶祝入波太過開心,同其他波友有太親密接觸,記得要保持Soical Distance。尋晚場大戰你哋有無睇呢,最終拜仁慕尼黑作客以1:0擊敗多蒙特,擴大榜首領先優勢至7分,睇嚟「蜜蜂兵團」餘下賽程要追趕拜仁,真係一啲都唔容易。

圖2:雙方今場正選陣容,多蒙特沿用上場3-5-2陣式;拜仁慕尼黑則排出慣用4-2-3-1陣式應戰。
心態謹慎 攻守認真

賽前雙方同樣明白呢場比賽重要性,球員由開波到完場一刻都非常集中,每位球員有紀律地執行自己防守職責(可參考圖3、4),令全程比賽張力十足。主隊多蒙特擺明車馬踢防守反擊,明顯地半放棄前場迫搶,將防線移後利誘拜仁慕尼黑防守球員向前推進(可參考圖2),從而令前線三叉戟夏蘭特、托根夏沙特及白蘭特有較大反擊空間;拜仁上半場佔據大部份控球權,但基於避免防線上出現太大被反擊空間,球員喺傳波選擇上唔會過於冒險,以安全為先。

多蒙特今仗大部份時間將防線移後,左右翼位古里路及夏基美更接近以左右二閘位置出現。
拜仁慕尼黑今仗防線非常緊密,基本上令多蒙特難於中路尋求突破機會。
一不留神 鑄成大錯

今場比賽雙方合共錄得24次射門,各有5次命中目標,各有1次護空門。其實整場比賽發展過程中,嚴格嚟講大家都無明顯犯錯,絕對係一場高水平比賽。不過,高水平比賽稍一犯錯,對方就能夠把握機會轉化成為入球。今場比賽唯一入球來自上半場尾段,拜仁攻勢源自左路策動,由左轉右轉移過程中,甘美治略帶運氣連執2次Second Ball,但若然定格觀察,不難發現白蘭特稍為偷懶半步,並無跟隨中場線由邊移向至中間,令中路突然出現空缺(可參考圖5),造就甘美治有丁點起腳空間,乖巧地笠過當時已經失位嘅門貝基(可參考圖6),最終成為比賽分野。

甘美治搶截Second Ball前,明顯見到白蘭特與中路之間有一大空位。
失波當刻多蒙特全部球員回防,可惜「人多手腳亂」並無球員向甘美治施加壓力,圖中亦能夠反映門將貝基企位過於貼近近柱。
細節勝一切 位置分工好仔細

兩對貴為德甲最強火力球隊,球迷當然預期會係大手交易,好可惜呢場比賽淨係出現一個入球。但係當你細心再睇,其實今場比賽大家喺防守工作上做得相當相當出色。多蒙特基本上上下半場整體防守位置無太大走樣(可參考圖7、8),球員一直執行教練法維爾戰術,當然,個人認為下半場喺落後情況下,需要加強前場壓迫,孤注一擲地放手一搏,夏蘭特傷出令戰場缺乏停球點,辛祖、托根夏沙特及白蘭特未能製造個人突破,直接令球隊難以進攻。另一方面,拜仁慕尼黑今場踢得非常有耐性,特別喺領先後踢得更為保守,保持球員與球員之間緊密距離。再者,適當地喺中前場給予對手壓力,令多蒙特難以從後場開始組織,成為今場比賽其中一個贏波因素。

上半場初段,明顯見到多蒙特將防線以後至相若20碼線。
縱使完半場前落後一球,多蒙特下半場為求保持中後場緊密度,難以喺前場進行高壓迫搶。
球迷可同圖3比較,拜仁慕尼黑上下半場貫徹同一防守戰術。
國泰、Germagic及Canon 全力支持體路東京奧運之旅。由2019年10月至2021年8月期間,國泰、Germagic及Canon將全力支持體路直擊香港奧運運動員「Road To Tokyo」之旅,體路「Road To Tokyo」專頁現已面世,立即Click入呢度,一齊 #撐起港隊。
Share via
Copy link
Powered by Social Snap