【體路專欄】P.B.帶領紅魔鬼 製造機會易話為



體路專欄,梁冠聰,足球,曼聯
普巴(左)同般奴費蘭迪斯首次喺英超一齊正選上陣。 Photo Credit: B/R Football Twitter

【體路專欄】人與人相處係一種好深奧嘅學問,有時候,一瞬間我以為或者一瞬間你以為,一瞬間我覺得或者一瞬間你覺得,足以產生好大誤會,對外人嚟講更加係難以明白。容易令人誤會嘅普巴噚晚終於出場,令一班等咗好耐嘅魔迷終於可以見到佢同般奴費蘭迪斯合作,結果呢對「P.B.組合」輕鬆帶領球隊以3:0擊敗錫菲聯,繼續向第4位車路士步步進迫。

體路專欄,梁冠聰,足球,曼聯
普巴對錫菲聯一戰出任Box-To-Box中場位置,整場表現發揮穩健。Photo Credit:ManchesterUnited Twitter

早前大部份球迷都談論究竟P.B.組合會係點擺放,領隊蘇斯克查曾經講過會將般奴費蘭迪斯放喺8號位置(Box-To-Box中場),普巴會放喺較前嘅進攻中場,不過,原來佢係呃人,實情係2個掉轉先真(可參考圖3)。單從噚晚比賽表現嚟睇,普巴專注成為馬迪及般奴費蘭迪斯橋樑,大部份時間出現喺兩者之間(可參考圖4)。當球隊嘗時從後場開始組織嘅時候,馬迪會墮後到2位中堅之間,普巴會因應對手位置喺適當地方出現,成為後場首個傳球目標。與此同時,般奴費蘭迪斯就會較有耐性地喺中前場「旮旯位」等候,令球隊組織上更具立體性。

體路專欄,梁冠聰,足球,曼聯
普巴成為馬迪同般奴費蘭迪斯之間嘅橋樑。
體路專欄,梁冠聰,足球,曼聯
馬迪經常墮後參與組織,普巴傾向喺中間成為傳球目標,般奴費蘭迪斯喺前場耐心等候。

除咗有波再腳組織時候分工清晰之外,普巴同般奴費蘭迪斯無波在腳嘅情況下,同樣有各自防守區域及目標,不論進攻同防守,整體效果非常理想。當曼聯嘗試進行前場逼搶嘅時候,般奴費蘭迪斯主動地靠近對方防守中場,普巴會向前捕捉另一名中場球員,馬迪就會留守較後位置應付對方進攻中場(可參考圖5)。喺另一個情況,當對手嘗試將嗰波左右轉移轉方向,普巴同馬迪會以雙防中姿態出現,一左一右,楚河漢界地每人照顧一邊,支援及包抄閘位或中堅隊友(可參考圖6),對防線進行完美保護。

體路專欄,梁冠聰,足球,曼聯
當球隊嘗試喺前場壓迫,普巴會主動移到較前位置。
體路專欄,梁冠聰,足球,曼聯
當球隊以陣地模式防守時,普巴同馬迪會變成雙防中。

陣式同戰術,往往都只係紙上談兵,而真正決定部署成唔成功,取決於球員場上紀律同執行性。曼聯過去一直以普巴為中心建立球隊,但佢喺場上過於「自由自在」地做自己想做嘅事情,反而對球隊產生反效果。如今普巴睇嚟大個仔啦,希望佢能夠明白球隊永遠大過球員嘅道理,適當時候要犧牲自己,適當時候要挺身而出,帶領球隊更進一步。

國泰、Germagic及Canon 全力支持體路東京奧運之旅。由2019年10月至2021年8月期間,國泰、Germagic及Canon將全力支持體路直擊香港奧運運動員「Road To Tokyo」之旅,體路「Road To Tokyo」專頁現已面世,立即Click入呢度,一齊 #撐起港隊。
Share via
Copy link
Powered by Social Snap